خنشة السكر : موروث ثقافي في الطريق نحو الاندثار

البيار والفليپير من ابرز الذكريات المشتركة عند بزاف ديال اطفال الزمن الجميل

 أول بيار لعبت فيه في حياتي كان ديال بحتي في اسايس.. كانو فيه جوج فئات : ديال ربعة دريال مقرقش و فيه غير خمسة ديال الكرات حتى هوما مقرقشين، و ديال عشرة دريال زوين و فيه سبعة د الكواري جداد.. مع القضية كانت واكحة، كنا كنلعبو غير في ديال ربعة دريال، حتى النهار اللي اكتشفنا فيه أن الأقراص كتشبه الفلوس في الشكل، و بما أنها كانت موجودة بالزايد، عكس الفلوس اللي كانت نادرة، كملوا من ريوسكم.. شبعنا بيار بالاقراص، و مازال النوع الممتاز بو سبع كواري، ديال عشرة دريال.. تما فين تعلمت ابجديات البيار، و تعلمت جميع انواع الضربات بداية من الجبدة، و الغانجو، و الميترو و العضة، بل تطور المستوى ديالي و اخترعت ضربات خاصة خلاتني نولي شديد معترف به، من بين الضربات الساحقة ديالي آمولز (الفديع) و الفرفارة، و لعل بعض الأصدقاء حاضرين هنا لتأكيد الأمر لأنهم كانو شهود على هادشي اللي كنقول..

الفليبير اكتشفتو من بعد عند محند تحت الأقواس.. كنت كنمشي نتفرج في الناس كتلعب، و يمكن نبقى تما ساعات و أنا واقف كنشوف شي داخل شي خارج، شي فرحان شي كاعي، ها اللي شعل الرومبوز، ها اللي شعل سبيسيال.. و المعلم الشديد هو اللي يلعب حتال اللخر و يبيع البارتية و يرجع درهم ديالو.. مع المدة وليت كنعرف شي وحدين كانوا مرة مرة كيعطيوني نلعب كورة من بعد ما يكونو ضمنو البارتي ديالهم.. دازت مدة طويلة على ما وليت كنضبر على درهم باش نجي حتى انا نلعب، من بعد ما حفظت القوالب ديال الفليبير غير من خلال الملاحظة و مشاهدة الناس اللي كتلعب.. و لكن معمرني كنت قادر على إتقانه و نولي شديد فيه، و كنتذكر أن اوعر واحد شفتو كيلعب الفليبير هو "النشوة" اللي كان متخصص في فليبير أمازون..

من بعد انتقلت للبيار ديال بلحاج، اللي جا في الدخلة ديال ايت ملول، مباشرة بعد القنطرة.. تما كنت كنلعب البيار مع أصدقاء الطفولة، و كنت كنشد الفانكور و كنلعب مع الشداد انا.. و الجميل في الأمر هو أن المنافسين تما كانو في الغالب ناس اكبر مني و المستوى ديال التعامل حتى هو كان عالي.. ملي كتكونطري بنادم بعقلو ماشي بحال ايلا لاعب مع شي واحد مبرهش.. كنت صغير في عمري، و كنتقاتل باش ما نبان برهوش.. في نفس المكان، اكتشفت الكولفازير و بالضبط ال15 .. و نفس القضية اللي وقعات لي مع الفليبير، كنت كنتفرج في الناس اللي كيلعبوه مدة غير باش نفهم كيفاش كيتلعب و شنو هي قوانين اللعبة و الاهم هو شنو هي القوالب ديالها.. اكبر عقبة في الأول كانت لاميز (سومة لعب مباراة واحدة) اللي كانت جوج دراهم !! رغم ذلك كنت مرة مرة كنضبر على جوج دراهم و كنلعب.. مرة مرة، كنا كنغفلو مول البيار و كنهزو الطابي باش نجرو واحد السلك باش يطيحو الكواري بحال ايلا ميزينا بالفلوس.. واحد المرة هزينا الطابي، و كان ثقيل، و خشى واحد الولد معانا يدو باش يجبد السلك، و فديك اللحظة دخل إبراهيم اللي خدام في البيار.. تخلعنا و طلقنا الطابي بالزربة و غوت الدري اللي معانا : يدي يا ولاد الحرام !!! واااااع !! كانت فرشة عالمية و ما تطوات ديك الصفحة الا بمشقة النفس..

وليت مجهد في الكولفازور و وليت كنشد فانكور في الطبلة و كنلعب مدة طويلة بلا ما نخسر ريال، لأن تكلفة اللعبة كيخلصها المنهزم.. شوية جابو طبلة ديال ال8 .. في الأول جاتني صعيبة نظرا للاختلاف الكبير في طبيعة اللعبة و حجم الكرات.. و لكن المنطق ديال الحساب د الزوايا هو هو.. تعلمت ال8 و وليت مزيان فيه حتى هو.. إلى درجة أن أول بطولة نظموها في داك المحل شاركت فيها و ربحتها.. 

من بعد، لعبت ال8 في بزاف د القاعات من بعد، و أبرزها قاعة الألعاب ديال بلعشور اللي كانت قدام مدرسة العهد الجديد.. تما كنت مواظب على الحضور كل مساء و طورت علاقات جميلة مع الناس اللي كانو تما و كسبت اصدقاء كنفتخر بيهم إلى حدود الساعة.. 

القاعات ديال الالعاب كلها بدون استثناء كان مسموح فيها بالكارو، و كانوا بعض القاعات كيخليو الكليان يكميو حتى الجوانات.. شحال من ماتش خسرتو غير حيث اللي لاعب معاه بوقني بشي جوان مريكل كيكميه باش يقاد المزاج ديالو هو، أما أنا بالله اللي كان عالم بيا.. بعض المرات كان كولشي كيبان ليا جوج، و بعض المرات كاتبان ليا الطابي كتموج بحال ايلا فيها الامواج.. صراحة، عندي الزهر ما تبليت لا بالكارو ولا شي حاجة أخرى..